Հյուրընկալ Արատեսը մեզ դիմավորեց իրեն բնորոշ ջերմությամբ և սիրով։ Մաքուր լեռնային օդն ու զմրուխտ կանաչ բնությունը դարձան մեր ճամբարային օրերի ամենագեղեցիկ զարդը։ Անմոռանալի հաճույք էր ժամանակ անցկացնել բնության գրկում, ստեղծագործել, ուրախանալ։
Օր առաջին
Մեր առաջին կանգառը Արփի գյուղն էր։ Այստեղ մեզ դիմավորեցին գյուղի երիտասարդական ակումբի երկու հյուրընկալ աղջիկներ, որոնք ուղեկցեցին դեպի Ջրովանք։ Ճանապարհին նրանք հետաքրքիր պատմություններ ներկայացրին գյուղի պատմության, Արփա գետի, հնագույն բերդի և Ջրովանքի մասին՝ մեր ճանապարհորդությունն ավելի բովանդակալից ու տպավորիչ դարձնելով։
Դեռևս կառուցման փուլում գտնվող ֆուտբոլի դաշտում մեծ ոգևորությամբ հանդիպեցին Արևմտյան և Հյուսիսային դպրոցների ֆուտբոլիստները։ Ընկերական խաղն անցավ աշխույժ և մրցակցային մթնոլորտում՝ համախմբելով մասնակիցներին և պարգևելով բազմաթիվ ուրախ պահեր։
Օր երկրորդ
Օրը սկսեցինք առավոտյան նախավարժանքով, որը մեզ լիցքավորեց առույգությամբ և բարձր տրամադրությամբ։ Այնուհետև մասնակցեցինք ուսումնական ժամերգությանը, որը խաղաղ ու հոգևոր մթնոլորտ ստեղծեց՝ գեղեցիկ սկիզբ դառնալով մեր ճամբարային երկրորդ օրվա համար։
Եղանակային պայմաններից կախված՝ Արատեսում իրականացվող երկրագործական աշխատանքներն ամեն օր տարբեր բնույթ են կրում։ Ընկեր Անժելայի հետ խնամում էինք տարածքը, փխրեցնում հողը և ջրում նորատունկ ծառերը՝ մեր փոքր ներդրումն ունենալով Արատեսի կանաչ ու խնամված միջավայրի պահպանման գործում։
Տեխնոլոգիական գործունեությունն էլ, ինչպես Արատեսի առօրյան, սերտորեն կապված է տարվա եղանակների հետ։ Իսկ ի՞նչ ամառ առանց բացօթյա պլեների։ Ընկեր Տաթևի ղեկավարությամբ Արևմտյան և Հյուսիսային դպրոցների ճամբարականները սիրով ստեղծագործեցին բնության գրկում՝ իրենց աշխատանքներում արտացոլելով Արատեսի գեղեցկությունն ու ամառային տրամադրությունը։
Օրն ամբողջական չէր լինի առանց զովացնող ոտթրջոցիի, որն ավելի բարձրացրեց բոլորի տրամադրությունը և դարձավ օրվա ամենաուրախ պահերից մեկը։
Իսկ գեղեցիկ ֆոտոշարքը լավագույնս պատմում է մեր անմոռանալի օրվա մասին։
Արատեսյան երեկոները խաղաղ են, զով և անչափ հաճելի։ Օրվա ամենասպասված պահերից մեկը դարձել էր ավանդական խարույկի շուրջ հավաքը, որտեղ ջերմ զրույցները, երգն ու ծիծաղը միավորում էին բոլորիս։ Աստղազարդ երկնքի ներքո, քաղաքի աղմուկից ու փոշուց հեռու, վայելում էինք բնության պարգևած խաղաղությունն ու հերթական հրաշալի երեկոն՝ լի ջերմությամբ, անկեղծությամբ և գեղեցիկ հիշողություններով։
Օր երրորդ
Առավոտյան տղաները, իրենց իրերը կարգի բերելուց և ճամպրուկները հավաքելուց հետո, նախաձեռնեցին մաքրել ճամբարի տարածքը՝ հոգատարությամբ պատրաստելով այն հաջորդ խմբի համար։
Մինչ նրանք զբաղված էին աշխատանքով, մենք՝ աղջիկներս, որոշեցինք նրանց հաճելի անակնկալ մատուցել։ Պատրաստեցինք համեղ բիսկվիթ և, աշխատանքն ավարտելուց հետո, բոլորս միասին վայելեցինք քաղցր հյուրասիրությունը։ Այդ ջերմ ու համախմբված պահը դարձավ մեր ճամբարային վերջին առավոտի ամենահիշարժան դրվագներից մեկը։
Ետդարձին ճանաչողական շրջայցով կանգ առանք թռչունների քարանձավում։
Անի Ենգոյան 